Serifika biigima leni Koleesi cogidiekpiali kuama titoali li binli 2026 po : mi biigima cilima mi diema nni tieni li cogidieli Untaani kani Fada N Gulima dogu nni u Gulumu désiyon nni
Serifika biigima leni Koleesi cogidiekpiali kuama titoali li binli 2026 po : mi biigima cilima mi diema nni tieni li cogidieli Untaani kani Fada N Gulima dogu nni u Gulumu désiyon nni
Serifika biigima leni Koleesi cogidiekpiali kuama titoali li binli 2026 po cilima tieni li binli 2026 ciluoba o dana 2 daali mi diema kuli nni. U Gulumu diema nni, li cogidieli Untaani A yaali n ye Fada tinbuona gaanilindima cogibiwaala cogu tuonsoandiegu 2 (SEBI 2) gobidima nni, n gaa gufenema cagili cangu. Yua n bi tugi li cagili yuli tie Matiasi TARAWORE wan yua n tie mi diema niba tuonsoanba koanbali. Yaaba n pugidi o po tie Ajima CONBIANU, o tie yaa koanbali n die a cogibigbenga cógú leni mi bancanma linginma tuona leni BAKO pua Fatoumata/ TARAWORÉ, o tie yaa koanbali n todi ku koanbadiegu yaagu n diidi ti diema loagu leni i ligi kubima tuona ke ku puogili tie Bàaló bidise tuona. Bani n gobidi Serifika biigima leni Koleesi cogidiekpiali kuama titoali cilima badu. Jaki Sositeni DINGARA wani yua n tie yaa koanbali n die a biwaala cógú, ti máamaamáama cógú leni ti diema mabuoli findima n luodi Serifika biigima leni Koleesi cogidiekpiali kuama titoali badu mi diema kuli nni. Hali ku tahaapanpangu, li cogidieli kani , a cogibila kuli bi sieni bi yantiana kaanyendu ki ŋmini suo. Ban tieni a cogibila yiinu ki gbeni ki go cogi ya bali maama n ba gobidi mi biigima cenŋanli po, canbaanba bi cili li boginli ki ŋoadi nani lan bili maama.
Bàalo paatieba Fada dogu nni leni u cogu kani paatieba n ciani li koanbali Jaki Sositeni DINGARA ke o luodi a biigi tila cici anvelopi. Lani n doagidi mi biigima cilima u Gulumu diema nni. Hali ke mi biigima daa cili, bi bi gaani a cogidiena nni ki paagi a cogibila pala .
Lani yaapo, a biwaala cogu Yudaano leni gufenema cagili doagidi bi pamanli leni canbaanba leni bi gobidikaaba n fii ki sedi maama mi biigima cenŋanli po ba leni mi yema n pa maama kuli. Jaki Sositeni DINGARA go jaandi a minteela leni a jakoanda kuli leni bi moandili yaala n tie li guunli po. Lani n todi ke mi biigima fidi ki tieni mi diema kuli nni leni mi yanduanma. O go pagi bi u cogu gobidikaaba leni ban bogini canbaanba maama li tuonli cenli ŋamu po. O waani ke « Bi tieni yaala n bua tienma kuli mi biigima cenŋanli po » A biwaala cógú, ti máamaamáama cógú leni ti diema mabuoli findima tuonsoandiegu Daapuoli désiyon nni, a cogibila yaaba n ba biigi coali n da maama doagidi canbaanba aniali. Bi go paagi bi bidanba pala ke bi kuani a bonpola boncianla u cogu. Dunla yaa binli 2026 po, Dapuoli désiyon nni, a cogila yaaba n den bili bi tila mi biigima po coali tie cogibila 11 522, lani n tie bonpola 6 163 leni bonjala 5 359. Li boginli po, bi bili diebuliñoana 251 ke li boagidi cagibila (santidinba) 79 leni cagiciama (sirinba) 28 ke li boagidi SEBI 23 désiyon nni.
Li cogidieli Untaani A tie yaa cogidieli kani ke bi gaani a cogibila kuli cangu. Leni a cogidiena gobidima liiga yua aniali po lani ntie Lamudi TANKPANI, o tie a biwaala cógú, ti máamaamáama cógú leni ti diema mabuoli findima tuona goandikoa, lankani yaa cagibiga pia cogibila yaaba n ba biigi 280 lani n tie bonpola 133 leni bonjala 147.
Laa cagibiga kani pia cogidomaabila 203 leni yaa cogibila n sani ki ñani bi deni mi yebiadima po 77. Lani n doagidi ke u cogu liigi yaaba moadi ki todi ke a cogibila cogu n da sedi mi yema n paa maama kuli nni.
Yaala n pugidi, li boncala lingima u cogu tuona nni tie yaala n moani bi nuni. Laa cagibiga kani, li pia cogibila 22 ke bi baa biigi ti máamaamáama nni, lani n tie mi gulimancema nni, Bi siiga li pia bonpola 10. Li go pia yaa cogibila n ñani ESESAPE cogidiena nni.
Mi diema kuli nni, yaa cogibila n ye Serifika biigima leni Koleesi cogidiekpiali kuama titoali li binli 2026 po coali tie 341 732 .
